අතුරුගිරිය පෝරේ ප්‍රදේශයේ බස් රථ ගාලක නවතා තිබූ බස් රථයකින් එහි සවිකර තිබූ DVD යන්ත්‍රයක් ඇතුලූ උපකරණ තොගයක් සොරකම් කිරීම සම්බන්ධයෙන් කනප්පුවක් කරකවා සොරා සොයා ගැනීමට කල උත්සහයක් නිසාවෙන් ඊයේ (30) සවස 3 සිට රාත්‍රී 9.30 පමණ දක්වා කාළයේදී අතුරුගිරිය නගරය හා ඒ ආසන්න ප්‍රදේශ දැඩි කළබලකාරී තත්වයකට පත් වී තිබුණා.
DVD යන්ත්‍රය සොයා ගැනීම සදහා මෙම ව්‍යාපාරිකයා විසින් කපු මහතෙකු කැඳවාගෙන විත් සවස තුනට පමණ පෝරේ ප්‍රදේශයේ පිහිටි බස් රථ ගාලෙන් කනප්පුව කැරකවීම ආරම්භ කර ඇති අතර පසුව අධික වැසි මධ්‍යයේ පවා කනප්පුව ඇවිදීම සිදුවූ අතර මෙලෙස ප්‍රදේශය පුරාම ඇවිදිමින් රැගෙන ගොස් රාත්‍රී 7ට පමණ අතුරුගිරි නගරයට ලගා වූ අතර එය රාත්‍රී 9.30 පමණ වනතුරු නගරයෙහි ඒ මේ අත මාරුවෙමින් නගරය පුරාම සැරිසැරීම නිසාවෙන් දැඩි රථ වාහන තදබදයක් ද ඇති වුණා.
එම අවස්ථාවේදී කනප්පුව කැරකූ පුද්ගලයින් වෙත පැමිණි අතුරුගිරිය පොලිසියේ රථ වාහන අංශයේ නිළධාරීන් විසින් මහජන පීඩාවක් සිදුවන බව පවසමින් ඒ පිලිබදව නීතිමය ක්‍රියා මාර්ග ගැනීමට කටයුතු කල යුතු බව පැවසීමත් සමග යම් උණුසුම් තත්වයක් ඇති වූ අතර පසුව පොලිස් නිළධාරීන් විසින් කනප්පුව කැරක වූ පුද්ගලයින්ගේ නම් සටහන් කර ගනිමින් එම ස්ථානයෙන් ඉවත් වූයේ පසුව අධිකරණය මගින් නීතිමය කටයුතු සිදු කරන බව පවසමින්.
පසුව යළිත් රාත්‍රී නවයට පමණ කනප්පුව කරකවීම ආරම්භ කල අතර රාත්‍රී 9.30 පමණ එක්වරම කනප්පුව රැගෙන යනු දක්නට ලැබුණා. අප ඒ පිලිබඳව සිදු කල විමසීමේදී කනප්පුව ඇවිද්දවීමේ නිරත වූ පුද්ගලයෙකු පැවසූවේ DVD සොරකමට සම්බන්ධ පුද්ගලයා බවට සැකකරන අයෙකු ඒ ආසන්නයේ සිටි බැවින් එය නතර කිරීමට පියවර ගත් බවත් කනප්පුව ඇවිද්දීම සාර්ථක යැයි තමා විශ්වාස කරන බවයි.
එහි වීඩියෝව පහතින්.....