එකම පවුලේ අයියා සහ නැගණිය විවාහ වී ලැබුණු දරුවෙකු අවාසනාවන්ත ලෙස මියගිය පුවතක් කුලියාපිටියෙන් වාර්තා වෙයි.
මෙලෙස මියගොස් අත්තේ වයස අවුරුදු දෙකක් වන පිරිමි දරුවෙක් බව වාර්තා වෙයි.
මෙම දරුවාගේ දෙමව්පියන් එකම පවුලේ අයියා සහ නංගී බව මෙහිදී අනාවරණ වී ඇත.
මොවුන් කුඩා කාලයේ ඔවුන්ගේ පියා මව සහ දරුවන් අත්හැර දමා ගොස් තිබේ.
එහිදී පවුලේ වැඩිමලා වූ මියගිය දරුවාගේ පියා ඔවුන්ගේ පියාගේ නැගණියගේ නිවසේ හැදීවැඩී ඇති අතර මියගිය දරුවාගේ මව වූ ඔහුගේ නැගණිය තම මව සමඟ සිට තිබේ.
කලකට පසුව මොවුන් දෙදෙනා කොළඹ ප්‍රදේශයට රැකියාව සඳහා පැමිණ ඇති අතර ඔවුන් දෙදෙනාම නවාතැන්ගෙන ඇත්තේ එකම නිවෙසකයි.
කෙසේ වෙතත් එහිදී ඇතිවූ ගැටලුකාරී තත්වයක් හේතුවෙන් මොවුන් දෙදෙනා නෑනා සහ මස්සිනා බව පවසා විවාහ වී ඇති අතර අනතුරුව ඔවුන් විසින් දරුවෙකු බිහි කර තිබේ.
අනතුරුව කුඩා දරුවාට මාස 8ක් පමණ වනවිට දරුවාගේ පෙණහැල්ලේ සිදුරක් ඇති බව අනාවරණ වී තිබේ.
පසු කලෙක අසාධ්‍ය වූ දරුවා කුලියාපිටිය රෝහලේ දැඩිසත්කාර ඒකකයට ඇතුලත් කිරීමෙන් අනතුරුව පසුගියදා මියගොස් ඇත.
මෙම දෙහැවිරිදි දරුවාගේ මරණය බහුවිධ ඉන්ද්‍රිය අකර්මන්‍යතාවයන් හා වෛරස් ආසාදනයක් හේතුවෙන් සිදුව ඇති බව මරණ පරීක්ෂණයේදී අනාවරණ වී ඇත.
දෙහැවිරිදි පිරිමි දරුවාගේ මරණය සම්බන්ධයෙන් කුලියාපිටිය රෝහලේ පැවති මරණ පරීක්ෂණයේදී කුලියාපිටිය නාගරික හදිසි මරණ පරීක්ෂක එස් පී හෙට්ටිගමගේ මහතා පැවසුවේ මෙවැන්නක්.
කුලියාපිටිය නාගරික හදිසි මරණ පරීක්ෂක එස් පී හෙට්ටිගමගේ මහතා
අයියා සහ නැගණිය ලෙස එක මවු කුස තුල ඉපිද අඹු සැමියන් ලෙස අසම්මත විවාහයක් සිදුකර ගැනීමට පොළඹවා ඇත්තේ සමාජයේ අසාධාරණ බලපෑම බව පැහැදිලි වනවා. සිදු නොවිය යුත්තක් සිදුවෙලා. මේ අසම්මත අඹු සැමි යුවළ සම්පුර්ණයෙන් නිර්දෝෂී නොවුනත් ඒ දෙපලගේ බිලිඳු දරුවාගේ මරණයට ඔවුන්ට ඒ අසාධාරණ බලපෑම් කළ සමාජයද යම් තරමකට වගකිවයුතු වනවා.