මොරටුව විශ්වවිද්‍යාලයෙන් විලාසිතා නිර්මාණකරණය හා නිපැයුම් ප්‍රවර්ධනය පිලිබඳ උපාධිය ලැබූ නැව යොවුන් වියේ පසුවන තරුණියන් දෙදෙනෙකු පැවිදි බිමට පිවිස සිටිති. මෙකී තරුණියන් දෙදෙනා මහරගම ධම්ම තුසිතා මෙහෙණින් වහන්සේ නමින් හා අතුරුගිරියේ ධම්ම සුඛිතා මෙහෙණින් වහන්සේ නමින් පැවිදි දිවියට ඇතුළත්ව සිටිති. බද්දේගම ගිනිමැල්ලගහ ආලෝකෝ උදපාදී සිල්මාතා භාවනා ආරාමයේදී මෙකී මෙහෙණින් වහන්සේ දෙනාම අපට මුණගැසුණි.
මෙකී මෙහෙණින් වහන්සේ දෙනාම සමඟ දැන උගත් මෙහෙණින් වහන්සේ සය නමක් භාවනායෝගීව ආරාමයේ වැඩ වසති. ධම්ම තුසිතා මෙහෙණින් වහන්සේගේ ගිහි කාලයේ ස්වාමිපුර්ෂයාද පැවිදි දිවියට පත්ව සිටිති. උන්වහන්සේද ගිහි කළ මොරටුව විශ්වවිද්‍යාලයේ විලාසිතා නිර්මාණකරණය හා නිපැයුම් ප්‍රවර්ධනය පිලිබඳ උපාධිධාරියෙකි.
මේ තිදෙනාම හිගි කළ මෙරට ප්‍රධාන පෙළේ ඇඟලුම් කම්හලක රැකියාව කොට තිබේ. රැකියාව කරන අවධියේදී බණ ඇසීමට යොමු වී ධර්ම මාර්ගය ගැන පැහැදී පැවිදි දිවියට පිවිස තිබේ.
“අපි දෙන්නා කතා කරගෙන තමයි මහන වෙන්න තීන්දු කළේ. ගහි කාලයේ මගේ සැමියා මට කලින් මහණ වුණා. ඔහු මහණ වුණේ මහේ මහණ පින්කමට අවශ්‍ය සියලු දේවල් කරලා. ඒ මහණ පින්කමට මමත් සහභාගී වුණා. ඒ වෙලාවේ මට හිතුණේ අනේ සාදු කියලා. අපි කොහෙද ඉන්නේ. මේ අපිට මොනවා දාලා යන්න බැරිවද ඉන්නේ කියලා හිතුනා. ඇත්තටම අත්හරින්න බැරි දෙයක් නැහැ. මගේ මහණ පින්කමට උන්වහන්සේත් සහභාගී වුණා.
තලගුණේ මෙත්තා ධම්මශීලි මෙහෙණින් වහන්සේ තමයි මාව මහණ කළේ. මේ වන විට මොරටුව විශ්වවිද්‍යායේ උපාධිය ලැබූ හය දෙනෙක් පැවිදි වෙලා ඉන්නවා. ඒ අය අතර වෛද්‍යවරු, ඉංජිනේරුවරුන්ද ඉන්නවා” යැයි මහරගම ධම්ම තිසිතා මෙහෙණින් වහන්සේ අප සමඟ කීහ. ධම්ම තුසිතා මෙහෙණින් වහන්සේ තිස්එක් හැවිරිදි වියේ පසුවෙති.
අතුරුගිරියේ ධම්ම සුඛිතා මෙහෙණින් වහන්සේ ගිහි කළ අකුරු කොට ඇත්තේ කොළඹ මියුසියස් විද්‍යාලයෙනි. ;උසස් පෙළ සමත් වීමෙන් පසු මොරටුව විශ්වවිද්‍යාලයට ඇතුළු වී උපාධිය ලබාගෙන ඇත.
“මගේ තාත්තා ඉන්ජිනේරුවරයෙන්. අම්මා විධායක නිලධාරිනියක් . බුදු පියාණන් වහන්සේගේ ධර්මය අවබෝධ කරගත්තු විට ඕනෑම දෙයක් අත්හරින්න පුළුවන්. ඉන්පසු මහණ වෙන්න තීන්දු කළා. මෙහෙණින් වහන්සේලාට වනගතව, ආරණ්‍යයගතව භාවනා කටයුතු කරන්න බැහැ. ආරක්ෂා තැනක ඉන්න ඕනි. කර්කශ නාගරික පරිසරයෙන් මිදිලා භාවනා කරන්න පුළුවන් ස්ථානයක් හදලා දෙන්න මාලනි දොඩන්ගොඩ යුවළගේ අරමුණක් තිබුණා. එය අපගේත් අවශ්‍යතාවක්. ත්‍රිපිටකය හදාරමින් භාවනා කරයුතු කරන්න, ගිහි පිරිසට අප හදාරණ දේවල්වලින් මඟ පෙන්වීමක් කරන්න. කොහොමද ධර්ම මාර්ගයේ යන්නේ ජීවිතය කොහොමද ධර්ම මාර්ගය අනුව හැඩගසා ගන්නේ කියලා අවබෝධ කරන්න ඕනි. බුදුරජාණන් වහන්සේ දේශනා කළ ධර්මය අපට තියෙන්නේ පොත්වල තබාගන්න නෙවෙයි.
ඒවා කියලා දෙන්න මෙම ආරාමයේ වැඩසටහන් කිහිපයක් කරනවා. සතියේ දිනවල අපි භාවනායෝගීව මෙම ස්ථානයේ වැඩ ඉන්නවා. ධර්ම දේශනා හා කර්මස්ථාන භාවනා සිදු කරනවා. යැයි අතුරුගිරියේ ධම්ම සුඛිතා මෙහෙණින් වහන්සේ පැවසුහ.
(ජනයුගය – 2017.06.30)