2018 වසරේ රුසියාවේ දී පැවැත්වීමට නියමිත ලෝක පාපන්දු තරගාවලියේ කුසලානය ක්‍රීඩා ලෝලීන්ට දැකබලා ගැනීම සඳහා රටවල් 54 ක සංචාරය කෙරෙන අතර මෙවර කුසලානය සංචාරය කෙරෙන ප්‍රථම රට ලෙස ශ්‍රී ලංකාව තෝරාගෙන තිබේ.
ශ්‍රී ලංකා පාපන්දු සම්මේලනයේ නිලධාරීන් හා අනුග්‍රාහකත්වය දක්වන ආයතන නියෝජිතයින් ඒ පිළිබදව ජනාධිපති මෛත්‍රීපාල සිරිසේන මහතා නිල වශයෙන් දැනුවත් කිරීම අද (21දා) පස්වරුවේ ජනාධිපති නිල නිවසේ දී සිදුවිය.
2018 ජනවාරි මස 23 දින පස්වරුවේ ශ්‍රී ලංකාවට රැගෙන ඒමට නියමිත ලෝක පාපන්දු කුසලානය අනතුරුව ජනාධිපති වෙත නිල වශයෙන් පිළිගැන්වීමට නියමිතව ඇත.
ජනවාරි 24 දින කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ දී මහජන ප්‍රදර්ශනය සඳහා විවෘත කෙරෙන ලෝක පාපන්දු කුසලානය එදිනම පස්වරුවේ මාලදිවයින කරා රැගෙන යාමට නියමිතය.