තන්තිරිමලය පොලිස් බල ප්රදේශයේ ඇති වන්නිහැලඹවැව, ‘වැල්මල්ගම’ ගම්මානයේ නිවෙසකට කඩාවැදුණු මහවිලච්චිය පොලිස් ස්ථානයේ නිලධාරීන් ඇතුළු පිරිසක් නිවැසියන්ට පහරදී දේපළ හානි කළ බවට වැල්මල්ගම ගම්වාසීහු චෝදනා නඟති.
ඉකුත් 25 වැනිදා බ්රහස්පතින්දා රාත්රි 8.30ට පමණ පොලිස් නිලධාරීන් ඇතුළු පිරිස තම පියාගේ සිල්ලර වෙළෙඳසලට හානිකොට ගිනි තබා, වයස අවුරුදු 65ක් වන පියාට, සුජීව මධුසංඛ යන තම සහෝදරයාට සහ තමන්ට බිම දමා පහරදී තුවාල සිදුකළ බව වැල්මල්ගම පී.බී. රුවන් චාමර බණ්ඩාර පැවැසීය.
පහරදීම හේතුවෙන් පී.බී. පුංචි බණ්ඩා යන අය රෝහල් ගතකොට ඇති බවත් වෙළෙඳසලට සහ යතුරුපැදියට ගිනි තැබීම මඟින් සිදු වූ හානිය රුපියල් ලක්ෂ තුනක් පමණ වන බවත් ‘වැල්මල්ගම’ ගම්වාසීහු පවසති. මහවිලච්චිය පොලිස් ස්ථානයේ රථවාහන අංශයේ නිලධාරීන් කිහිපදෙනකු සහ මහවිලච්චිය පොලිස් බල ප්රදේශයේ බණ්ඩාරගම ගම්වාසීන් පිරිසක් මේ පහරදීම සඳහා පැමිණි බව ගම්වාසීහු පවසති. මෙසේ පැමිණි පොලිස් නිලධාරීන් කිහිපදෙනකු නිල ඇඳුමින් පැමිණ ඇති බවත් ගිනි තැබීම සඳහා භාවිත කළ පෙට්රල් පොලිස් කැබ් රියෙන් ගෙන ආ බවටත් ගම්වාසීහු චෝදනා කරති. අදාළ සිදුවීම පිළිබඳ පැමිණිල්ල භාරගැනීම තන්තිරිමලය පොලිස් ස්ථානය ප්රතික්ෂේප කළ බවද ඔවුහු කියති.
මේ සිදුවීම පිළිබඳව කරුණු විමසීම සඳහා දුරකතන අංක 0252223322 මඟින් මහවිලච්චිය පොලිස් ස්ථානය අමතා අදාළ අවශ්යතාව දැන්වූ විට මොහොතක් රැඳී සිටින ලෙස දන්වා දුරකතනය විසන්ධි කරන ලදී. පොලිස් මාධ්ය ප්රකාශක කාර්යාලයෙන් කළ විමසීමකදී එහි ප්රකාශකයකු පැවැසුවේ සිදුවීම සම්බන්ධයෙන් සවිස්තර වාර්තාවක් තම කාර්යාලය වෙත මෙතෙක් ලැබී නොමැති බවය.