පොල් ගෙඩියක් නිසා මුරකරුගේ තුවක්කුවෙන් හිස පසාරු වූ උපුල් අවසන් හුස්ම හෙළයි
අනවසරයෙන් ඉඩමකට ඇතුළුවී පොල්ඇහිදීමට ගිය බව කියන පුද්ගලයෙකුට එහි මුරකරු විසින් වෙඩි තැබීමේ පුවතක් වැලිවේරිය ඉඹුල්ගොඩ ප්‍රදේශයෙන් වාර්තා වනවා. වෙඩි වැදීමෙන් අදාල පුද්ගලයා ජීවිතක්ෂයට පත්ව ඇති අතර, ඔහුගේ ඥාතීන් චෝදනා කරන්නේ මුරකරු විසින් සිතාමතාම මෙම ඝාතනය සිදු කර ඇති බවයි.
පහළ ඉඹුල්ගොඩ ප්‍රදේශයේදී මෙම වෙඩි තැබීම සිදුවුණේ පෙරේදා සවස 6.30 ට පමණයි. පොලිසිය සඳහන් කළේ පොල් වත්තකට අනවසරයෙන් ඇතුළු වී පොල් ඇහිදීමට ගිය අයෙකු එම වත්තේ මුරකරුගේ වෙඩි ප්‍රහාරයට ලක්ව ඇති බවයි.
සිද්ධියෙන් ජීවිතක්ෂයට පත්වුණේ ඉහළ ඉඹුල්ගොඩ ප්‍රදේශයේ පදිංචිව සිටි චන්දන උපුල් කිත්සිරි නමැත්තෙක්.
පොලිසිය සදහන් කළේ කුරුල්ලන්ට වෙඩි තැබීමට යොදා ගන්නා උණ්ඩ මෙම වෙඩි තැබීමට යොදාගෙන ඇති බවයි.
කෙසේ වෙතත්, මියගිය පුද්ගලයාගේ ඥාතීන් අදාළ වෙඩි තැබීම සම්බන්ධයෙන් මෙලෙස අදහස් පළ කළා.
''මරන්න තරම් දෙයක් නෙවෙයිනේ පොල් ගෙඩියක් කඩන එක.කාට හරි කියන්න තිබුණනේ. මෙහෙම ඇවිල්ලා ඉන්නවා අල්ලන් ඉන්නවා මොකක් හරි කරන්න ඕගොල්ලෝ කියලා මොකද නෑදෑයොනේ පිට මිනිස්සු නෙවෙයිනේ ඒගොල්ල. ජීවිතයක් වටින්නේ රුපියල් 50ද.
අතක හොර බඩුවක් තිබිලා නෙවෙයි. පොල් ගෙඩියකට ඔහොම දෙයක් කරන්න අවශ්‍යතාවයක් නෑ ඒගොල්ලන්ට. ඔලුවකට වෙඩි තියන්න. කකුලකට වෙඩි තිබ්බනම් අපි ගෙවල්වල ගෙනත් තියාගෙන වෙදකම් කරනවා. අනේ ලාල් මාමේ වෙඩි තියන්න එපා මට කිව්වලු.එහෙම කියද්දිත්නේ වෙඩි තියලා තියෙන්නේ.''
මෘත දේහය පිළිබඳ පශ්චාත් මරණ පරීක්ෂණය ගම්පහ රෝහලේදී ඊයේ (28) පස්වරුවේ සිදු කිරීමෙන් පසු දේහය ඥාතීන් වෙත භාර දී තිබෙනවා.
මේ අතර වෙඩි තැබීම සම්බන්ධයෙන් සැකපිට අදාළ වත්තෙහි මුරකරු වැලිවේරිය පොලිසිය මගින් අත්අඩංගුවට ගෙන ගම්පහ මහේස්ත්‍රාත් අධිකරණයට ඉදිරිපත් කළා. එහිදී අධිකරණය නියෝග කළේ සැකකරු ලබන 12 වැනිදා දක්වා රක්ෂිත බන්ධනාගාරගත කිරීමටයි.
SOURCE- Hirugossip
SOURCE- Hirugossip